Niyonshuti Emerance yanze gusubira muri Rayon Sports WFC

Nyuma yo gutsindwa urubanza yarezegagamo Rayon Sports WFC asaba gusesa amasezerano, Niyonshuti Emerance yahisemo kudasubira mu kazi k’iyi kipe n’ubwo yari yabitegetswe na Komisiyo y’Amategeko ya FERWAFA.

Mu minsi ishize ni bwo, nyuma yo kumva impande zombi, Komisiyo y’Amategeko mu Ishyirahamwe ry’Umupira w’Amaguru mu Rwanda (FERWAFA) yemeje ko ikirego cya Niyonshuti nta shingiro gifite, bityo agatsindwa urubanza. Iyi komisiyo yanahise itegeka ko uyu mukinnyi asubira mu kazi ke muri Rayon Sports WFC, kuko amasezerano ye yari agifite agaciro.

N’ubwo byari byemejwe gutyo, amakuru dukesha Umuseke avuga ko Niyonshuti Emerance atigeze agaruka mu Nzove.Ahubwo ngo yahisemo gukomeza imyitozo muri Police WFC, bivugwa ko yamaze kumusinyisha amasezerano mashya, ibintu bivugwa ko binyuranyije n’amategeko kuko yari agifitanye amasezerano na Rayon Sports WFC.

Andi makuru avuga ko impamvu nyamukuru yatumye atagaruka, ari ipfunwe ryo gusubira mu kipe yari yareze ayisaba kumurekura, kandi akiyifitiye amasezerano y’umwaka umwe. Ubuyobozi bwa Rayon Sports WFC bwamwandikiye bumusaba kugaruka mu kazi ndetse bumusaba ibisobanuro ku kutitaba.

INDI NKURU WASOMA :Lomami Marcel yahishuye umuti yavugutiye izamu rya Rayon Sports

Hari amakuru kandi avuga ko Emerance yasabye Rayon Sports WFC kumusubiza miliyoni eshatu z’amafaranga y’u Rwanda (3,000,000 Frw) Police WFC yari yaramwishyuriye ku ishuri, na we akazayabasubiza. Icyakora, ubuyobozi bwa Rayon Sports WFC bwo bwamusabye ko mbere yo kuyahabwa yabanza gusinya amasezerano mashya.

Uku kudahuza kwatangiye kugaragara nyuma y’imikino ya CECAFA y’abagore yabereye muri Kenya, aho Niyonshuti yagaragaje kutishimira uko yari abayeho muri Rayon Sports WFC, avuga ko hari imishahara ibiri atari yarishyuwe. Gusa igenzura rya FERWAFA ryaje kwemeza ko nta mwenda ikipe yari imurimo, kuko yari yaramwishyuye biciye kuri konti ye ya banki.