Mohamed Salah yasabye imbabazi bagenzi be muri Liverpool

Rutahizamu wa Liverpool , Mohamed Salah yasabye imbabazi bagenzi be nyuma y’ikiganiro cyari cyateje umwuka mubi mu ikipe.

Nyuma y’umukino Liverpool yanganyijemo na Leeds ibitego 3-3, Salah yatunguranye agaragara mu kiganiro n’itangazamakuru atishimiye imyitwarire y’ikipe n’umutoza mushya Arne Slot.

Uyu munya-Misiri w’imyaka 33 yari yongeye gushyirwa ku ntebe y’abasimbura ku mukino wa gatatu wikurikiranya, ibintu atari asanzwe amenyereye.

Mu magambo ye, Salah yavuze ko yumvaga ariwe wegetsweho urusyo rw’ibibazo by’ikipe ndetse anemeza ko nta mubano mwiza afitanye n’umutoza.

Ibyo byatumye abafana n’abasesenguzi bibaza ku hazaza h’umubano wa Salah n’ikipe. Gusa Curtis Jones, umukinnyi wo hagati wa Liverpool, yatangaje ko Salah yaje kwisobanura imbere y’abandi bakinnyi mbere yo kujya mu marushanwa ya CAN muri Maroc.

INDI NKURU WASOMA :shampiyona ya volleyball yo ku mucanga yafunguwe ku mugaragaro

Jones yavuze ko Salah yasabye imbabazi mu mwuka mwiza, agira ati: “Yatubwiye ko niba hari uwo yababaje cyangwa watumye yumva atishimye, abimusabira imbabazi. Ni we muntu Salah ari we.”

Yakomeje avuga ko Salah yari ameze nk’ibisanzwe, aseka kandi afitanye umubano mwiza n’abandi.

Uyu mukinnyi wo hagati yemeje ko amakimbirane nk’aya akenshi aterwa n’inyota yo gutsinda no gufasha ikipe, atari ugushaka kuyisenya.

Yagize ati: “Iyo hari uburakari, buba buvuye ku mugambi mwiza. Rimwe na rimwe amagambo ashobora gusohoka nabi, ariko si ukugira ngo bigire ingaruka mbi ku ikipe.”