Lomami Marcel yashidikanyije ku munya –Misiri uri kugeragezwa

Mu gihe Rayon Sports ikomeje kugerageza abakinnyi bashya mu myitozo ikorera mu Nzove, hari umwe wakuruye amaso ya benshi ku mbuga nkoranyambaga ndetse no mu bakunzi b’iyi kipe. Uyu ni Al Ismael Ahmed, umukinnyi ukomoka mu Misiri, wagaragaye yambaye umwambaro wa Rayon Sports ku myitozo yo ku wa Kabiri w’iki cyumweru.

Ku gicamunsi cy’uwo munsi, amafoto n’amashusho by’uyu mukinnyi byahise bikwira ku mbuga nkoranyambaga, benshi batungurwa n’igihagararo cye kinini ndetse n’uko umwambaro wa Rayon Sports yagaragayemo mu buryo butunguranye.

Abari baje kureba imyitozo mu Nzove batangiye kwibaza inkomoko ye n’icyo yaba azaniye iyi kipe, bamwe bategereje kureba niba ashobora kugaragaza ubushobozi mu kibuga.

INDI NKURU WASOMA:Umunyarwanda yazamuwe mu ikipe nkuru ya CF Montréal

Nyuma y’iyo myitozo, umutoza wungirije wa Rayon Sports, Lomami Marcel, yatangaje ko hakiri kare kugira byinshi yatangaza kuri uyu Munya-Misiri. Yavuze ko imyitozo ya Al Ismael Ahmed ikiri hasi, bikaba bisaba igihe kugira ngo asuzumwe neza.

Ati: “Uriya Munya-Misiri yaje adafite imyitozo ihagije. Hari imyitozo twashyizeho ubona ko yayinaniwemo, ariko byose biri mu rwego rwo kumureba. Tuzongera tumurebe no mu minsi iri imbere kuko haracyari igihe. Icyo navuga ubu ni uko imyitozo ye iri hasi.”

Abajijwe niba ashobora kuzavamo umukinnyi wagirira akamaro Rayon Sports, Lomami Marcel yasubije ko umupira w’amaguru usaba kwihangana no guha umwanya ibintu bikagaragara uko bigenda. Yagize ati: “Ni ugukomeza kureba, kuko byose biracyafite igihe.”

Iyi myitozo kandi yari irimo n’undi mukinnyi uri kugeragezwa, rutahizamu w’Umugande Ssenoga Kagawa, uri mu Rwanda mu biganiro byo kurangizanya na Rayon Sports.