Rwanda Premier League yazanye imipira yo gukina mishya

Urwego rutegura Shampiyona y’Icyiciro cya Mbere mu Rwanda, Rwanda Premier League (RPL), rwatangaje ko rwinjiye mu bufatanye bushya na sosiyete ya Prostar Sports International yo muri Nigeria, mu rwego rwo kuzamura ireme ry’imipira ikoreshwa mu mikino ya shampiyona.

Aya masezerano y’imyaka itatu ateganya ko iki kigo ari cyo kizajya gitanga umupira wemewe uzakoreshwa mu mikino yose ya RPL.

Mu buryo busanzwe, amakipe akinira ku kibuga cy’uwakiriye akoresha imipira y’iyo kipe, ndetse ifite uburenganzira bwo kubuza iyasuye kwerekana umupira wayo mu gihe cy’umukino.

Ibi byose bigiye guhinduka kuko guhera muri Mutarama 2026, amakipe azajya akoresha imipira imwe yujuje ubuziranenge kandi itangwa ku buntu.

RPL yatangaje ko Prostar Sports International izajya itanga imipira yakozwe ku rwego rwo hejuru, ihuye n’ibipimo mpuzamahanga kandi inogeye amarushanwa akomeye.

Uru rwego rwemeje ko ibikorwa byo gukora no gukwirakwiza iyi mipira byamaze gutegurwa, bityo amakipe yose akazayihabwa bitagurijwe.

Jules Karangwa, Umuyobozi Mukuru wa Rwanda Premier League, yavuze ko aya masezerano ari intambwe ikomeye mu guteza imbere umupira w’u Rwanda.

Ati: “Kuba dukorana na Prostar Sports International bizatuma amakipe yacu akina yizeye ko afite umupira w’ubuziranenge buhambaye. Ibi bizazamura uburyo imikino itegurwa n’uburyo abakinnyi babasha kwitwara mu kibuga.”

Ku ruhande rwa Prostar Sports International, na bo bashimangiye ko binjiye muri ubu bufatanye bafite icyizere n’ishyaka ryo guteza imbere shampiyona y’u Rwanda.

Paul Maduakor, Umuyobozi Mukuru w’iki kigo, yagize ati: “Gukorana na Rwanda Premier League ni amahirwe akomeye kuri twe. Twiyemeje gutanga imipira izafasha kuzamura urwego rw’abakinnyi no gutuma shampiyona irushaho gukurura abafana n’abayikurikirana.”

INDI NKURU WASOMA:FIFA irashinjwa kwica nkana amategeko yayo

Umupira mushya wa RPL uzaba ukozwe ku buryo bugezweho, ufite ishusho yihariye ihuza n’umuco n’isura y’u Rwanda. Uzatangira gukoreshwa mu mikino yo muri 2026 nyuma yo kugeza kuri buri kipe.

Ibi bitangajwe mu gihe Shampiyona y’Icyiciro cya Mbere igeze ku Munsi wa 11, uzakinwa kuva tariki ya 11 kugeza ku ya 14 Ukuboza 2025.

KWAMAMAZA: Niba utarafunguza konti muri Fortebet kandi ukaba wifuza gutega ku mukino itandukanye utavuye aho uri kandi ku bikubo utasanga ahandi mu Rwanda gana Fortebet; kwiyandikisha kanda hano winjire mu muryango mugari utagira uwo uheza hanyuma uhabwe ikaze ry’amafaranga 200 frw yo gukoresha ipari ya mbere, Kanda munsi 👇👇👇
https://www.fortebet.rw/?pref_device=desktop&utm_source=thedrum_rw&utm_medium=leaderboardHP&utm