Ethiopia : Rutahizamu w’Amavubi akomeje gufasha ikipe ye kwitwara neza

Umukinnyi w’Umunyarwanda ukina asatira anyura ku mpande, Sibomana Patrick uzwi cyane nka Papy, ari kubyitwaramo neza muri Shampiyona y’Icyiciro cya mbere muri Ethiopia, aho ubu ikipe ye ya Ethio Electric Sport Club, iri ku mwanya wa mbere ku rutonde rwa shampiyona.

Nyuma y’iminsi ine ya shampiyona, iyi kipe ikomeje kuba ku isonga n’amanota 10, aho yatsinze imikino itatu ikanganya umwe wonyine.

Sibomana Patrick, wageze muri iyi kipe mu Ukwakira 2025 nyuma yo gutandukana na Al Wehda yo muri Libya, bigaragara ko yamaze kwisanga muri ikipe neza cyane ndetse yagaragaje impinduka zikomeye mu busatirizi bwayo.

Uyu mukinnyi wamenyekanye cyane mu Rwanda akinira amakipe yaho nka APR FC na Police FC, amaze gutsindira Ethiopia Electricity ibitego bibiri anatanga umupira umwe wavuyemo igitego mu mikino ine gusa amaze gukina.

Mu kiganiro kigufi yagiranye n’itangazamakuru nyuma y’umukino batsinzemo igitego 1-0 Ethiopia Coffee, Papy yagize ati:“Nishimira uburyo nishimiwe hano muri Ethiopia. Ikipe ifite intego nziza kandi ndumva mfite inshingano zo kuyifasha kugera kure. Ntabwo byoroshye, ariko ndumva ndi mu rugo.”

Abakunzi b’iyi kipe bavuga ko Papy yazanye umuvuduko n’ubwenge bwo gukina bitari bisanzwe bimenyerewe muri shampiyona yabo, mu gihe n’abatoza bavuga ko bagize amahirwe yo kugira umukinnyi ufite ubunararibonye nk’ubwe.

Ethiopia Electricity, ni ikipe y’ikigo cy’igihugu gicunga amashanyarazi muri Ethiopia, umwaka ushize yarangirije ku mwanya wa 12, gusa ariko ubu biragaragara ko intego yayo ari uguhatanira igikombe cy’uyu mwaka w’imikino wa 2025–2026.

INDI NKURU WASOMA : 1000 Hills Derby: Rayon Sports yakiriye izindi mbaraga mbere yo guhura na mukeba

Umutoza mukuru wayo yatangaje ko kubona umukinnyi ufite ubunararibonye mpuzamahanga nka Sibomana byahinduye byinshi, byongera icyizere mu ikipe.

Sibomana Patrick Papy w’imyaka 29, afite ubunararibonye bukomeye kuko yakiniye amakipe atandukanye arimo Mukura VS, Yanga SC yo muri Tanzania, Gor Mahia yo muri Kenya, Clube Ferroviária de Beira yo muri Mozambique, El Ettihad Al Misraty yo muri Libya ndetse na Shakhter Soligorsk yo muri Belarus.