Amakipe ya Polisi yitwaye neza muri Medwell Pre-Season Volleyball Tournament 2025

Ikipe ya Police VC mu bagabo na Police WVC mu bagore nizo zegukanye ibikombe by’Irushanwa rya Medwell Pre-Season Volleyball Tournament 2025, ryasojwe ku wa Gatandatu tariki ya 11 Ukwakira 2025 kuri Petit Stade i Remera.

Iri rushanwa ryitabiriwe n’amakipe yo mu cyiciro cya mbere mu Rwanda, ryari rigamije gufasha ayo makipe kwitegura Shampiyona y’umwaka w’imikino wa 2025/2026 izatangira ku wa 17 Ukwakira 2025.

Ni ku nshuro ya mbere ryari ribaye, ku bufatanye n’Ishyirahamwe ry’Umukino wa Volleyball mu Rwanda (FRVB), rikazajya riba buri mwaka.

Mu cyiciro cy’abagabo, Police VC yegukanye igikombe itsinze Kepler VC amaseti 3-0 (25-22, 25-19, 25-21). Umukinnyi wayo Angiro Gideon ni we watowe nk’uwahize abandi muri iri rushanwa.

Ku ruhande rw’abagore, Police WVC yatsinze APR WVC amaseti 3-0 (25-20, 25-21, 25-16), itwara igikombe, ndetse umukinnyi wayo Ndagijimana Iris ahabwa igihembo cy’umukinnyi mwiza.

Mu makipe yakinnye, harimo arindwi yo mu bagabo: APR VC, Police VC, REG VC, Kepler VC, Gisagara VC, EAUR VC na KVC. Mu bagore hakinnye amakipe atanu: Police WVC, APR WVC, RRA VC, Kepler WVC na EAUR WVC.

INDI NKURU WASOMA : Nyuma yo gusiba shampiyona y’isi;Mugisha Moïse yongeye gufatwa n’uburwayi

Mu cyiciro cy’abakanyujijeho, ikipe ya Kinyinya VC yatsinze Rwanda National Team Legends amaseti 2-1 (19-25, 25-21, 18-25), yegukana igikombe.

Muri iyo kipe harimo ibyamamare byakanyujijeho nka Ndamukunda Flavien na Dusabimana Vincent ‘Gasongo’, wari wavuze ko intego yabo ari ugufasha abato babatoza gukunda no gukomeza uyu mukino.

APR VC yegukanye umwanya wa gatatu mu bagabo itsinze REG VC amaseti 3-2 (25-16, 20-25, 28-26, 22-25, 15-9), naho mu bagore, Kepler VC yegukanye umwanya wa gatatu itsinze RRA VC amaseti 3-1 (22-25, 25-21, 25-19, 25-23).

Mu cyiciro cy’ibigo by’ubuzima, igikombe cyegukanywe na MINISANTE itsinze MEDSAR amaseti 3-1 (25-23, 20-25, 25-21, 25-21).

Iri rushanwa kwinjira kwari ubuntu, abanyarwanda bitabiriye ku bwinshi ryatangijwe ku wa Gatanu, risozwa ku wa Gatandatu hakinwa imikino ya nyuma.

KWAMAMAZA: Niba utarafunguza konti muri Fortebet kandi ukaba wifuza gutega ku mukino itandukanye utavuye aho uri kandi ku bikubo utasanga ahandi mu Rwanda gana Fortebet; kwiyandikisha kanda hano winjire mu muryango mugari utagira uwo uheza hanyuma uhabwe ikaze ry’amafaranga 200 frw yo gukoresha ipari rya mbere, Kanda munsi 👇👇👇

https://newseason-rw-login2.fortebet.info/?pref_device=desktop&utm_source=thedrum_rw&utm_medium=leaderboardHP&utm