Umujinya w’abafana ba Kongo- Kinsaha nyuma yo gutsindwa na Senegal wasize sitade y’igihugu ari igisenzegeri !

Umujinya w’abafana b’Ikipe y’Igihugu ya Repubulika Iharanira Demokarasi ya Congo [DRC] wasize Stade des Martyrs, imwe muri stade zikomeye muri Afurika, yangijwe bikomeye nyuma y’uko Les Léopards itsinzwe na Sénégal ibitego 3-2 mu mukino wo gushaka itike y’Igikombe cy’Isi cya 2026.

Mu mukino wari witezwe na benshi muri iki gihugu, DRC yatangiye neza itsinda ibitego bibiri hakiri kare. Cédric Bakambu yafunguye amazamu ku munota wa 25, akurikirwa na Yoane Wissa ku wa 32, bituma abafana batangira kwizera intsinzi.

Ariko ntibyarambye kuko Sénégal yigaranzuye binyuze kuri Pape Gueye ku munota wa 38, Nicolas Jackson ku wa 53, maze Pape Matar Sarr asoza umukino atsinda igitego cy’intsinzi ku munota wa 86.

Ibi byahise bituma abafana ba DRC bari buzuye Stade des Martyrs batangira imyigaragambyo y’urugomo bamena intebe, ibirahure by’iyi sitade ndetse n’ibindi bikoresho bitandukanye birononwa mu buryo bukomeye.

INDI NKURU WASOMA BIFITANYE ISANO : Twagirayezu Thaddée yagaragaje ibyabaye amasigaracyicaro hadaciye kabiri inteko rusange ya Rayon Sports ibaye !

Mu mashusho y’ibyabaye yakwirakwijwe ku mbuga nkoranyambaga, benshi banenga imyitwarire y’abo bafana.Rodriguez Katsuva, umwe mu basesenguzi b’imikino bo muri Congo, yanditse kuri X ati: “Bangije intebe nyinshi kandi ejo Didier azasaba miliyoni 12 zo kuzisimbuza. Ibaze aka kanya hari irushanwa riteguwe i Kinshasa maze tugasezererwa ku ikubitiro. Turi ubuhe bwoko bw’abaturage mu by’ukuri?”

Nubwo ibi byabaye ntago byabujije ikipe ya Sénégal kuzuza amanota 18, iyobora itsinda B, mu gihe hasigaye imikino ibiri gusa ngo hasozwe urugendo rwo guhatanira itike y’Igikombe cy’Isi kizabera muri Leta Zunze Ubumwe za Amerika, Mexique na Canada.

DRC iri ku mwanya wa kabiri n’amanota 16, ikurikiwe na Sudan (12), Togo (7), Mauritania (6) na Sudan y’Epfo (4).