Transfers : Andre Onana wa Manchester United mu nzira zo gusohoka kuri Old Trafford!

Mu gihe habura iminsi mike ngo  isoko ry’igura n’igurisha ry’abakinnyi mu gihugu cya Turukiya rifungwe ku mugaragaro , amakuru yizewe aturuka mu bantu ba hafi ya André Onana yemeza ko uyu munyezamu wa Manchester United yamaze kwemera kujya mu ntazinyano mu ikipe ya Trabzonspor  muri Turkey.

Nubwo aya masezerano atarashyirwaho umukono burundu, hari icyizere ko byose bishobora kuzaba byarangiye mbere y’umukino wa mbere w’iyi kipe, bazahuramo na Fenerbahce ku Cyumweru, tariki ya 14 Nzeri.

Amakuru dukesha ikinyamakuru Daily Mail avuga ko nubwo Onana ari kumwe n’ikipe y’igihugu ya Cameroun mu mikino yo gushaka itike yo kwerekeza mu gikombe cy’isi, ariko ibyo ntibibuza ko impande zombi zishobora kurangiza ibisigaye mu masezerano mbere y’uko isoko ry’igura n’igurisha ry’abakinnyi mu Bwongereza rifunga ku wa Gatanu w’iki cyumweru.

Uyu mukinnyi w’imyaka 29 yari yigeze kuvugwa mu yandi makipe yo muri iki gihugu arimo Galatasaray, ariko iyi yo yahisemo gusinyisha umazamu witwa Ugurcan Cakir, waje gukinira iyi kipe avuye muri Trabzonspor ku itariki ya 2 Nzeri.

Ku ruhande rwa Manchester United, kumurekura ntibyatungurana bijyanye nuko ubuyobozi bwari bwaramaze kwerekana ko kimwe mu bizakurikiraho ari ukurekura umwe hagati ye na Altay Bayindir, nyuma y’uko ku munsi wa nyuma w’isoko, United isinyishije Senne Lammens imuvanye muri Royal Antwerp.

Nubwo bamwe mu bayobozi bavuga ko bishoboka kugira abazamu bane mu ikipe nkuru, umutoza Ruben Amorim we yifuza ikipe nto, cyane cyane ko nta marushanwa y’i Burayi azitabira muri uyu mwaka w’imikino .

Onana yari yarangije umwaka ushize ari umunyezamu wa mbere w’iyi kipe, aho yanabanjemo ku mukino wa nyuma wa Europa League batsinzwemo na Tottenham igitego 1-0.

Uyu munyezamu wahoze akinira Inter Milan yageze muri United mu 2023 aguzwe miliyoni £47.2, aho yifuzwaga cyane na Erik ten Hag, wahoze amutoza muri Ajax.

Ivomo : Daily Mail na Daily Telegraph